Рэзнікаў назваў неабходнаую Украіне зброю

• 17.05.2022, 21:45

Такое ўзбраенне захавае жыцці ўкраінцам.

Украіне патрэбная зброя, здольная паражаць ворага на далёкіх дыстанцыях. Такое ўзбраенне захавае жыцці ўкраінцаў.

Пра гэта паведамляе РБК-Украіна са спасылкай на міністра абароны Украіны Аляксея Рэзнікава.

«Вайна разбурае ўкраінскую эканоміку. З кожным днём павялічваецца патрэбнасць у рэсурсах для аднаўлення. Зацягванне вайны цягне за сабой рызыку глабальнага харчовага крызісу, а таксама чарговага міграцыйнага крызісу», – напісаў у сваім Facebook Рэзнікаў.

Ён удакладніў, што Украіна імкнецца перамагчы ворага і вызваліць захопленыя тэрыторыі ў найкарацейшыя тэрміны. Кіраўнік Мінабароны таксама адзначыў, што Расеі нельга даць зацягнуць вайну.

«Таму мы вельмі зацікаўленыя ў атрыманні міжнароднай дапамогі, куплі зброі максімальна хутка і ў патрэбных колькасцях. Нам патрэбны танкі, бронемашыны, сродкі пашкоджання на доўгіх дыстанцыях (MLRS, цяжкая артылерыя, авіяцыя, ракеты). Мы імкнёмся захаваць жыццё нашых людзей», - падкрэсліў міністр.