Дарадца мэра: Акупанты хочуць аддаць Марыупаль кадыраўцам

• 17.05.2022, 14:27

Захопнікі палічылі горад занадта «непрыязным».

Расейскія ўлады хочуць аддаць часова акупаваны Марыупаль на разрабаванне чачэнцам.

Пра гэта паведамляе дарадца мэра Марыупаля Пётр Андрушчанка.

«Становіцца патроху зразумелым, што акупанты плануюць рабіць з Марыупалем і хто будзе ўмоўным «куратарам аднаўлення». Нашы крыніцы з асяроддзя Івашчанкі (часовы кіраўнік акупацыйнай «адміністрацыі», дэпутат гарсавета ад «АПЗЖ» - УНІАН) паведамлялі аб «шэфстве» ад Чачэніі – праз тое, што Марыупаль апынуўся занадта непрыязным і нацыяналістычным. Таму для запалохвання і падаўлення супраціву плануецца аддаць горад «кадыраўцам». З портам і правам марадзёрства», - піша ён.

Андрушчанка паведамляе, што інфармацыя ўжо часткова пацвердзілася - чачэнскія палітыкі ўжо сустрэліся з акупантамі горада.

«Сёння ў Марыупалі ўпершыню адбылася рабочая сустрэча з удзелам акупацыйнай адміністрацыі, дэпутата Дзярждумы РФ Дзмітрыя Сабліна (куратар акупацыі Марыупаля з 2014 года) з Адамам Дзелімханавым і Ахмедам Далгаевым, якія з'яўляюцца фактычна часткай палітычнай улады Чачэніі», - распавядае дарадца мэра.

Пры гэтым Андрушчанка зазначае, што «кадыраўцы» паводзілі сябе як гаспадары і хутчэй праводзілі інвентарызацыю таго, што засталося, чым абмяркоўвалі «планы аднаўлення».