Буйны пажар у Расеі: у Новасібірскай вобласці палае хімзавод
- 17.05.2022, 10:52
Плошча ўзгарання можа даходзіць да 2-х тысяч квадратных метраў.
У Бердску Новасібірскай вобласці (Расея) загарэўся буйны завод вырабу ўпаковачных матэрыялаў.
Пра гэта гаворыцца ў паведамленні расейскага МНС.
Спецыялісты службы пажаратушэння, якія прыбылі на месца выкліку, аб'явілі трэці ранг складанасці пажару. На месцы працуюць 10 пажарных разлікаў ці дзесяць брыгад на аўтацыстэрнах.
Відавочцы ў сацсетках заяўляюць, што плошча ўзгарання можа даходзіць ад 500 да 2 000 квадратных метраў.
Зараз змагары з агнём лакалізуюць буйное ўзгаранне і абараняюць суседнія збудаванні ад пераходу полымя.
Паводле папярэдніх звестак, унутры будынка знаходзіцца вытворчасць матэрыялаў з поліэтылену. Калі на месца прыбылі першыя выратавальныя падраздзяленні, агнём быў ахоплены ўвесь дах двухпавярховага цаглянага будынка.
З аператыўнай інфармацыі, самастойна з будынка эвакуаваліся шэсць чалавек. Звесткі аб пацярпелых не паступалі.