Катастрофа расейскага МіГ-31: з'явілася відэа першых секунд пасля падзення знішчальніка
- 2.12.2022, 14:38
Відавочцы паведамляюць, што самалёт загарэўся ў паветры.
2 снежня ў Расеі ўпаў знішчальнік МіГ-31. Кадры першых секунд пасля падзення самалёта патрапілі на відэа, апублікаванае InformNapalm.
Расейскі МіГ разбіўся ў Прыморскім краі. У РФ ужо кажуць, што «самалёт упаў у бязлюдным месцы» і «разбурэнняў» нібыта няма.
Відэа падзення самалёта было знятае з сяла Таежнага. На ім можна ўбачыць першыя секунды пасля падзення самалёта МіГ-31 у Прымор'і.
Знішчальнік упаў у лясным масіве недалёка ад вёскі Аляксееўкі ў Надзеждзінскім раёне.
Відавочцы гавораць, што самалёт загарэўся ў паветры. Калі знішчальнік пралятаў над трасай Уладзівасток - Усурыйск, з задняй часткі ў яго вырывалася полымя. У нейкі момант ён здзейсніў рэзкі манеўр у бок сяла Аляксееўкі (50 кіламетраў ад Уладзівастока), а затым рэзнуўся ў сопку. Пасля гэтага над сопкай на некалькі секунд з'явіўся чорны дым.