У Браславе затрыманы арганізатар музычных фэстаў Сяргей Садоўскі

• 10.12.2022, 15:32

На яго мерапрыемствы з'язджаліся музыкі з усёй Беларусі.

У Браславе затрымалі арганізатара музычных фэстаў Сяргея Садоўскага. Пра гэта паведамляюць віцебскае аддзяленне праваабарончага цэнтру «Вясна» і краязнаўца і блогер Кастусь Шыталь.

На думку Шыталя, затрыманне можа быць звязанае з беларускай сімволікай у сацсетках, што трэба дачакацца судовага працэсу на падставе арт.24.23 КоАП за т.зв. «пікетаванне ў інтэрнэце».

«У Віцебскай вобласці з пачатку 2022 года сілавікі актыўна афармляюць пратаколы «пікетавання» з фатаграфіямі і аватарамі ў сацсетках. Гэта нейкае дзіўнае рэгіянальнае ноў-хаў», - піша блогер.

Сяргей Садоўскі вядомы ў райцэнтры як арганізатар канцэртаў, музычных мерапрыемстваў і фэстаў «Жывое неба Браслава», на якія з'язджаліся музыкі з усёй Беларусі.