У Менску батарэі ў кватэрах сталі значна цяплейшымі

• 30.11.2022, 19:22

Камунальнікі павысілі тэмпературу ў сістэме цеплазабеспячэння.

У Менску камунальнікі значна павысілі тэмпературу ў сістэме цеплазабеспячэння – гэта звязана з пахаладаннем у найбліжэйшы час, паведамляе Мінэнерга.

– Паводле звестак сіноптыкаў, гэтай ноччу і ў наступны дзень тэмпература паветра апусціцца да -10°С. У сувязі з гэтым тэмпература магістральнага цепланосьбіта ў цеплавых сетках сталіцы будзе павышаная з 76 да 90–93 градусаў, – гаворыцца ў паведамленні.

У «Менскіх цеплавых сетках» адзначылі, што пастанова пра павышэнне або паніжэнне тэмпературы батарэй прымаецца загадзя на падставе прагнозу надвор'я.

– Карэктаванне праводзіцца пад кантролем дыспетчарскіх службаў у аўтаматычным рэжыме. Рэгуляванне цяпла забяспечваецца за кошт змянення тэмпературы цепланосьбіта і яго аб'ёму, – дадалі камунальнікі.

Калі ў кватэры недастаткова цёпла, трэба звяртацца ў свае жыллёва-эксплуатацыйныя арганізацыі для наладкі ўнутрыдамавой сістэмы або пакідаць звароты ў кантакт-цэнтры 115.бел.