Над «Гродна Азотам» узняўся «лісіны хвост»

• 29.11.2022, 12:35

Што адбываецца?

Чытачы «АўтаГродна» дасылаюць фота жоўтага дыму з адной з труб «Гродна Азота».

«Лісіны хвост» - жаргонная назва выкідаў у атмасферу аксідаў азоту (NOx) на хімічных прадпрыемствах (часам - з выхлапных труб аўтамабіляў). Назва паходзіць ад аранжава-бурага колеру дыяксіду азоту. Пры нізкіх тэмпературах дыяксід азоту дымерызуецца і становіцца бясколерным.

Учора, 28 лістапада, паведамлялася, што ў планавым парадку будзе ўключана ў працу аддзяленне азотнай кіслаты і кампрэсіі цэха Акікас.

Выданне «Гродзенскі хімік» папярэдзіла, што пускавыя аперацыі ў цэху АКіКАС суправаджаюцца кароткачасовым павелічэннем утрымання NOx у газах.

Аксід азоту, які ўваходзіць у склад NOx (IV) надае газам характэрнае чырвона-бурае адценне.

Дапушчальны выкід забруджвальных рэчываў у газах рэгламентаваны комплексным прыродаахоўным дазволам, выдадзеным тэрытарыяльным органам Міністэрства прыродных рэсурсаў і аховы навакольнага асяроддзя Рэспублікі Беларусь.

Падчас правядзення пускавых аперацый ажыццяўляецца кантроль якасці атмасфернага паветра на тэрыторыі і па перыметры прадпрыемства, а таксама на граніцы санітарна-ахоўнай зоны з улікам кірунку ветру.

Звесткі пра атмасфернае паветра ў ССЗ прадпрыемства будуць апублікаваныя на афіцыйным сайце ААТ «Гродна Азот».