Навукоўцы палепшылі памяць мышэй з дапамогай харчовага дадатку з малака
- 27.11.2022, 20:04
Ці выйдзе скарыстаць адкрыццё для дапамогі людзям?
Навукоўцы з Нацыянальнага ўніверсітэта дыстанцыйнай адукацыі ў Мадрыдзе выявілі, што харчовы дадатак з малака прадухіляе старэчае зніжэнне кагнітыўных функцый у паджылых пацукоў. Даследаванне апублікаванае ў часопісе Food Research International.
Старэнне звязанае са зніжэннем кагнітыўных здольнасцяў, збольшага памяці ды выканаўчых функцый. Паасобныя даследаванні сведчаць аб тым, што недастатковае спажыванне пэўных фасфаліпідаў з ежай можа павялічыць рызыку будучых кагнітыўных парушэнняў і дэмэнцыі. Крыніцай гэтых рэчываў могуць быць харчовыя дадаткі з канцэнтрату мэмбран малочных тлушчаў (MFGM).
У параўнанні з кантрольнымі жывёлінамі пацукі, якія атрымлівалі MFGM, прадэманстравалі лепшую прасторавую працоўную памяць. Эфекты не датычыліся здольнасці да прасторавага навучання і эмацыйнай памяці. Дакладных адрозненняў паміж узроўнямі нэйратрафічнага чынніка мозгу (BDNF) у гіпакампу і лобнай кары выяўлена не было. Затое ў пацукоў, якія прымалі MFGM, адбыліся значныя змены ў складзе мэмбран нэрвовых каморак, а таксама павысілася змяшчэнне квасаў EPA і DHA у сінапсах.
Хоць для пацвярджэння вынікаў навукоўцаў неабходныя далейшыя даследаванні, гэтая праца дазваляе выказаць здагадку, што дадаткі MFGM можна выкарыстоўваць у якасці дадатку для аднаўлення належнай канцэнтрацыі некаторых біяактыўных ліпідаў у мозгу і прадухілення або запаволення прагрэсавання старэчых кагнітыўных парушэнняў.