Беларускія памежнікі «падкінулі» Украіне групу нелегалаў

• 26.11.2022, 20:43

Мігранты сцвярджаюць, што іх падвезлі да мяжы людзі ў форме і падказалі, куды ісці.

Украінскія памежнікі затрымалі на мяжы з Беларуссю групу нелегальных мігрантаў. З іх паказанняў, іх «падкінулі» беларускія памежнікі.

Як паведамляе прэс-служба Дзяржаўнай пагранічнай службы Украіны, затрыманыя шэсць грамадзян Пакістана і Бангладэш.

- Мужчыны расказалі, што з тэрыторыі Беларусі да мяжы з Украінай іх на аўтамабілі давезлі мужчыны ў вайсковай форме, як мяркуецца, прадстаўнікі памежнай службы Беларусі, і ўказалі ў якім кірунку павінны ісці. Таксама загадалі пасля пераходу мяжы паведаміць аб сваім месцазнаходжанні. Гэта пацвярджаюць перапіскі тэлефона замежнікаў, - гаворыцца ў паведамленні.

У ДПСУ падкрэслілі, што Беларусь працягвае падтрымліваць штучна створаны міграцыйны крызіс і наўмысна накіроўвае плыні мігрантаў у кірунку Украіны, але ўкраінскія памежнікі ўжо былі гатовыя да такіх правакацый.

- Цяпер з затрыманымі праводзяцца мерапрыемствы праверкі і ўстанаўліваюцца ўсе акалічнасці іх нелегальнага падарожжа, - дадалі ў ДПСУ.