УСУ знішчаюць войскі РФ на поўдні і ўсходзе: карта баявых дзеянняў

• 4.10.2022, 11:10

Акупацыйныя часці вымушаны адыходзіць усё далей.

Узброеныя Сілы Украіны развіваюць контрнаступ на розных адцінках фронту, на ўсходзе краіны, тады як расейскае акупацыйнае войска вымушана адыходзіць усё далей.

Аб галоўных выніках баявых дзеянняў цягам дня 3 кастрычніка паведамілі ў Military Land.

Купянскі кірунак

Украінскія вайскоўцы вызвалілі ад расейскіх акупантаў Петрапаўлаўку на ўсход ад Купянска. Акрамя таго, УСУ прасунуліся на поўнач уздоўж ракі Аскол і вызвалілі Баравую і найбліжэйшую Шыеўку.

Паводле папярэдняй інфармацыі, акупацыйнае войска пакінула пазіцыі ўздоўж Аскола і адышло ў бок Сватавага на поўдзень ад Купянска.

Усходні кірунак

Паблізу Салядара і Бахмуцкага працягваюцца баявыя дзеянні. Акупанты спрабавалі прасунуцца бліжэй да Бахмута, але пацярпелі паразу. Таксама Сілы абароны адбілі атакі расейцаў у кірунку Вясёлай Даліны, Атрадаўкі і Зайцава.

Са звестак Генштаба УСУ, расейскія акупанты абстралялі ўкраінскія пазіцыі ў раёне Навасадоўскага і Цярноў, таму, магчыма, абодва населеныя пункты знаходзяцца пад кантролем Украіны.

Разам з гэтым Сілы абароны набліжаюцца да Крамянной, на пазіцыі якой перайшлі расейскія акупанты з Лімана.

Данецкі кірунак

У Данецкай вобласці ўкраінскія сілы адбілі атакі расейскіх захопнікаў у кірунку Першамайскага і Невельскага.