Politico: Пуціну «гамон», у Расеі пачалася гонка за ролю новага лідара Крамля
- 12.10.2022, 8:23
Праз тры-чатыры месяцы могуць адбыцца кардынальныя змены.
Няўдачы акупантаў у вайне супраць Украіны прывялі да таго, што ўпершыню за два дзесяцігоддзі апаненты расейскага прэзідэнта Уладзіміра Пуціна разглядаюць як верагодную ягоную адстаўку. У РФ спрачаюцца датычна таго, хто можа замяніць кіраўніка Крамля.
Пра гэта ідзе размова ў матэрыяле Politico. Адзначаецца, што ўсё залежыць ад ходу вайны, якая абарочваецца супраць яго і падрывае яго непераможнасць.
У артыкуле звярнулі ўвагу на тое, што ў кіраўніцтве РФ пачалася ўнутраная барацьба і з'явіліся тыя, хто крытыкуе дзеянні адзін аднаго і вайсковага камандавання.
«Чыноўнікі зараз, відавочна, спрабуюць скарыстацца зменлівым палітычным ландшафтам. Назіральнікі Крамля сцвярджаюць, што ўспышкі публічнага іншадумства з боку прадстаўнікоў расейскай эліты, сярод іншага чачэнскага лідара Рамзана Кадырава і кіраўніка групы Вагнера Яўгена Прыгожына, беспрэцэдэнтныя», – адзначыў аўтар.
Акрамя таго, Міхаіл Касьянаў, прэм'ер-міністр Пуціна з 2000 да 2004 года, выказаў меркаванне, што ўлада прэзідэнта можа раптоўна аслабнуць.
«Я думаю, што праз тры-чатыры месяцы адбудуцца кардынальныя змены», – падзяліўся ён.
Іншыя апаненты Пуціна ўстрымліваюцца ад прагназавання тэрмінаў, аднак амаль упэўненыя, што вайна становіцца прычынай паваротнага моманту і пачатку канца для «расейскага цара».
Аўтар звярнуў увагу, што Кадыраў і Прыгожын пазбягалі прамога асуджэння Пуціна. Гэта можа служыць інтарэсам Крамля - абвінаваціць вайскоўцаў і адвесці гнеў ад Пуціна. Не ўтрымаўся ад крытыкі міністэрства абароны і сам Пуцін - ён папракнуў яго за няправільнае выкананне загаду аб мабілізацыі.
У Крамлі таксама не сталі папракаць ні Прыгожына, ні Кадырава, які і зусім атрымаў новы ранг генерал-палкоўніка.
"Тым не менш, прыкметы ўнутранай барацьбы за ўладу, якая складаецца з двух асноўных альянсаў: «партыі вайны» на чале з Кадыравым і Прыгожыным і супрацьлеглай фракцыі, якая складаецца з органаў бяспекі, Шайгу і Валерыя Герасімава, начальніка Генштаба, цалкам наглядныя», - пракаментаваў у сваю чаргу прадпрымальнік і апазіцыянер Міхаіл Хадаркоўскі.
Ён апісаў два магчымыя сцэнары на выпадак, калі вайна і надалей будзе няўдалай для Пуціна.
Згодна з першым, лагеры-канкурэнты ў РФ аб'ядноўваюцца і ціснуць на Пуціна, каб ён пайшоў у адстаўку. Кіраўніку Крамля абяцаюць імунітэт і захаванне яго багаццяў. У такім выпадку новым лідарам РФ стане прэм'ер-міністр Міхаіл Мішусцін. Аднак у гэтым выпадку, мяркуе Хадаркоўскі, пачнецца барацьба за тое, хто будзе яго кантраляваць.
Другі сцэнар мяркуе сутыкненне паміж «партыяй вайны» і іх апанентамі ў органах бяспекі і абароны, якія з'яўляюцца значна больш фрагментаванымі і дэмаралізаванымі.
Ці зможа Пуцін перажыць наступствы сваёй вайны, незразумела. «Я больш не разглядаю яго як прагматычнага. Ён усё больш і больш спадзяецца на свае эмоцыі», - рэзюмаваў Хадаркоўскі.