Эрдаган запрасіў Пуціна і Зяленскага на перамовы ў Турцыю
- 19.01.2022, 11:58
Найбліжэйшым часам кіраўнік турэцкай дзяржавы мае намер наведаць Кіеў з афіцыйным візітам.
Прэзідэнт Турцыі Раджэп Эрдаган запрасіў прэзідэнтаў Украіны і Расеі Уладзіміра Зяленскага і Уладзіміра Пуціна ў Турцыю, каб абмеркаваць цяперашнюю эскалацыю ў дачыненнях краін. Пра гэта паведаміў прэс-сакратар Эрдагана Ібрагім Калін, адзначае Daily Sabah.
Калін заявіў, што Турцыя гатова адыграць усялякую ролю, каб знізіць напружанасць у дачыненях паміж Расеяй і Украінай.
Таксама ён падкрэсліў, што Турцыя не падтрымлівае ніякіх вайсковых дзеянняў Расеі супраць Украіны ці якіх-небудзь канфліктаў і войнаў паміж дзвюма краінамі, і Анкара выступае ў падтрымку тэрытарыяльнай цэласнасці і суверэнітэту Украіны.
Прэс-сакратар дадаў, што Эрдаган пагаварыў з Пуціным і Зяленскім, каб знайсці выхад з цяперашняга крызісу, і запрасіў іх сустрэцца ў Турцыі, каб абмеркаваць шляхі развязання.
Акрамя таго ён паведаміў, што Эрдаган найбліжэйшыя некалькі тыдняў наведае Украіну з афіцыйным візітам, каб сустрэцца з Зяленскім.