Беларус налавіў рыбы і ракаў на 4,4 тысячы рублёў

• 18.01.2022, 20:17

На маёмасць мужчыны накладзены арышт.

Пару месяцаў таму 45-гадовы беларус з выкарыстаннем надзіманай лодкі ўстанавіў на Бярозаўскім возеры ў Сенненскім раёне пяць стаўных лескавых сетак. Такая рыбалка прынесла яму ўлоў у 13 ляшчоў, 11 асобін плоткі, 14 асобін гусцяроў, 11 рачных акунёў, мянтуз і 47 асобін вузкалапага раку. Цяпер на маёмасць мужчыны коштам звыш 6,2 тысячы рублёў накладзены арышт.

Як паведамляе прэс-служба Генеральнай пракуратуры Рэспублікі Беларусь, сваімі супрацьпраўнымі дзеяннямі мужчына нанёс шкоду навакольнаму асяроддзю на суму звыш 4,4 тысячы рублёў. Абвінавачаны прызнаў віну ў поўным аб'ёме. У пракуратуры Віцебскай вобласці прыйшлі да высновы, што зробленае падыходзіць пад частку 2 артыкула 281 Крымінальнага кодэкса Рэспублікі Беларусь - «Незаконная здабыча рыбы або іншых водных жывёл». Цяпер мужчына знаходзіцца пад падпіскай аб нявыездзе.