«Ніводная нацыянальная каманда не будзе перамагаць за гэтай калгаснай уладай»

• 17.01.2022, 16:06

Незмяняльнасць - роўна дэградацыя.

Выканаўчы дырэктар Беларускага фонду спартыўнай салідарнасці Аляксандр Апейкін прааналізаваў гульню нацыянальнай каманды ў гандболе.

- Незмяняльнасць - роўна дэградацыя.

Не бачу ніякага сэнсу разбіраць канкрэтныя памылкі ў матчах беларускіх нацыянальных каманд. Не важна, ці ідзе гаворка пра футбол, хакей, гандбол ці воднае пола. Ніводная нацыянальная каманда не будзе перамагаць за гэтай калгаснай уладай, з гэтай сістэмай, з гэтымі трэнерамі. Уся сістэма накіраваная на прыгнечанне асобы, знішчэнне індывідуальнасці, стварэнне разнастайных забарон і абмежаванняў. Развівацца можа нешта насуперак, а не дзякуючы.

Больш за дзесяць гадоў незмяняльнасці тандэму Канаплёў-Шаўцоў выліліся ва ўчарашні правал з палякамі, які паказаў усю пацяруху гандбольнай канструкцыі - нулявы ўзровень нацыянальнага чэмпіянату, адсутнасць інстытута нацыянальных каманд, шматгадовая залежнасць ад гульні аднаго-двух гульцоў. Выбудаваць паспяховую гульню нацыянальнай каманды, абапіраючыся на пяць гульцоў еўрапейскага ўзроўню, у сучасным гандболе немагчыма, - мяркуе Апейкін.

Нагадаем, што пасля паразаў ад нацыянальных каманд Нямеччыны і Польшчы, нацыянальная каманда Беларусі страціла шанцы на выхад у асноўны раунд чэмпіянату Еўропы.