У Страсбургу адчынілася сесія ПАРЕ

• 27.09.2021, 12:26

Расейская дэлегацыя не прыехала.

Расейская дэлегацыя не прыехала на восеньскую сесію Парламенцкай асамблеі Рады Еўропы, якая адчынілася ў панядзелак у Страсбургу, паведамляе «Радыё Свабода».

Як паведаміў яе кіраўнік Пётр Талстой, прадстаўнікі Расеі будуць удзельнічаць у сесіі дыстанцыйна. Прычынай адмовы ад паездкі ў Францыю ён назваў абмежаванні, звязаныя з каранавірусам. У атрыманым расейскімі дэлегатамі прадпісанні французскіх уладаў гаварылася, што яны не прышчэпленыя прызнанымі ў ЕЗ вакцынамі і прыбываюць з так званай чырвонай зоны, у сувязі з чым ім было дазволена вольна перамяшчацца толькі паміж гатэлем і будынкам ПАРЕ.

Вакцына "Спадарожнік V", якой, як сцвярджаецца, прышчэпленыя расейскія дэпутаты, у ЕЗ не ўхваленая і такім чынам прышчэпка ёю не бярэцца ў разлік. Уезд для расейцаў, якія не валодаюць відам на жыхарства ў ЕЗ, у большасць краінаў Шэнгенскай зоны па-ранейшаму зачынены або істотна абмежаваны.

Чакаецца, што на сесіі зноў будзе ўзнятае пытанне пра паўнамоцтвы расейскай дэлегацыі – у сувязі з анэксіяй Крыма. Расейскі палітык Уладзімір Кара-Мурза напярэдадні сесіі заклікаў не прызнаваць паўнамоцтвы дэлегацыі ў сувязі з фальсіфікацыямі на нядаўніх выбарах у Дзярждуму.

На парадку дня сесіі на гэты момант – выбары суддзі Еўрапейскага суда ў правах чалавека (уключаючы прадстаўніка Расеі), пытанні клімату, ацэнка выбараў у шэрагу краінаў (Расея ў іх не ўваходзіць), армяна-азербайджанскі канфлікт.

Не выключана, аднак, што сесія вызначыць правесці тэрміновыя дэбаты і паводле іншых пытанняў, у іх ліку сітуацыя ў Афганістане, міграцыйны крызіс на мяжы Беларусі і краінаў ЕЗ, пераслед крымскіх татараў у анэксаваным Крыме і пастанова ЕСПЧ у справе аб забойстве Аляксандра Літвіненкі, што ўсклала адказнасць за гэтае забойства на Расею.