У Нідэрландах бясплатна раздадуць ровары тым, хто мае патрэбу

• 20.09.2021, 15:15

Акцыя пройдзе ў межах Еўрапейскага тыдня мабільнасці.

У Гаазе (Нідэрланды) бясплатна раздадуць ровары тым, хто не можа дазволіць сабе купіць іх самастойна. Акцыя пройдзе ў межах Еўрапейскага тыдня мабільнасці (EUROPEANMOBILITYWEEK), піша «Еўра пульс».

За некалькі гадоў у муніцыпалітэце сабралася вялікая колькасць ровараў, гаспадары якіх з той ці іншай прычыны пакінулі іх на вуліцах горада. Цяпер ровары здабудуць новых гаспадароў. Для гэтага мэрыя горада збярэ і адрамантуе забытыя транспартныя сродкі, каб раздаць іх тым, хто мае ў гэтым патрэбу.

Еўрапейскі тыдзень мабільнасці праходзіць штогод з 16 да 22 верасня. У рамках Тыдня горада ўдзельнікі праводзяць розныя мерапрыемствы, звязаныя з развіццём устойлівага транспарту і барацьбой з забруджваннем паветра (напрыклад, Дзень без аўтамабіля).

Дэвіз цяперашняга Еўрапейскага тыдня мабільнасці: «Бяспека і здароўе з устойлівай мабільнасцю».

Сёлета Тыдзень адзначае свой 20-ы юбілей. У гонар гэтага арганізатары запусцілі віртуальны музей, які распавядае пра самыя цікавыя акцыі гарадоў у дасягненні ўстойлівасці і іх вынікі.