Ля консульскай управы МЗС штодня збіраюцца вялізныя чэргі

• 17.09.2021, 17:40

У чым прычына?

Штодня каля консульскай Управы Міністэрства Замежных Спраў Беларусі на вуліцы Карла Маркса, 37 становяцца вялікія чэргі з людзей, якія падаюць дакументы на апастыль.

Консульская Управа МЗС Беларусі, якая знаходзіцца ў сталіцы на вуліцы Карла Маркса, 37, па буднях адкрытая для ўсіх, каму неабходна паставіць апастыль на дакументы. Час працы, у які трэба паспець прыйсці, з 8:00 да 10:30.

Ва ўнутраным дворыку, дзе знаходзіцца аддзяленне МЗС, людзі заўсёды станавіліся ў чаргу і чакалі, але нядаўна ўвялі некаторыя змены, якія ўскладнілі працэс падачы дакументаў на апастыль. У выніку, чэргі сталі яшчэ большымі. Электроннага запісу тут няма. Даступная толькі жывая чарга.

Відавочцы распавялі blizko.by, як праходзіць працэс падачы дакументаў:

- Прыйшоў да 7:30, каб паспець падаць дакументы. Людзей у чарзе было ўжо вельмі многа, перада мной блізу 40 чалавек, а за мной - яшчэ больш. Блізу 9 гадзін раніцы выйшаў адзін з працаўнікоў МЗС і сказаў не займаць чаргу, хоць раней такога не было, прымалі ўсіх, хто прыходзіў, - распавёў Яўген. - На вуліцы ўжо досыць холадна, каб стаяць тут па 3-4 гадзіны і не факт, што паспееш.

Мы пагутарылі яшчэ з адной жанчынай, якая прынесла свае дакументы на падачу. Таццяна - грамадзянка Украіны, яна таксама падзялілася з намі сваёй гісторыяй падачы дакументаў.

- Сёння я прыходжу ўжо другі дзень запар, бо ўчора не паспела. Мне здаецца, чаргу трэба займаць а 6 гадзіне раніцы, каб паспець на падачу адным з першых, інакш незразумела, паспееш ці не, - распавяла Таццяна. - А як стаяць тут 2-3 гадзіны, калі так холадна, тут скразны двор, таму ўвесь час вецер, шкада, што няма электроннай чаргі.

Журналістка Blizko.by некалькі дзён прыходзіла да будынка консульскай Управы МЗС, каб зірнуць на чаргу: з кожным днём людзей у чарзе становіцца ўсё больш і больш. Часам можна налічыць больш за 100 чалавек.

Таксама нагадаем, што з нядаўніх часоў, на падачу дакументаў на апастыль увялі абмежаванне. Цяпер можна за адзін раз падаць да 5 дакументаў.