BBC: Мядзведзеў спрабаваў вярнуцца ў публічную палітыку Расеі, але яму не дазволілі

• 15.09.2021, 16:07

Пасля адстаўкі ён «залёг на дно» ў сваёй рэзідэнцыі.

Былы прэм'ер-міністр Расеі, намеснік старшыні Савета бяспекі Дзмітрый Мядзведзеў цягам года змагаўся за тое, каб стаць спікерам Дзярждумы, супраць гэтага выступіў намеснік кіраўніка адміністрацыі прэзідэнта Сяргей Кірыенка. Пра гэта паведамляе BBC са спасылкай на аповеды амаль 20 крыніц у вышэйшых органах улады.

Са слоў крыніц, Мядзведзеў хацеў стаць спікерам Дзярждумы, каб зноў здабыць фармальны статус уплывовай палітычнай фігуры.

Кірыенка адказвае за арганізацыю і правядзенне выбараў у Дзярждуму, а таксама за вынік «Адзінай Расеі», адзначаецца ў матэрыяле.

Пяцёра крыніц у «Адзінай Расеі», распавялі, што на гэтых выбарах абмеркаванне лідараў спісу АР праходзіла ў рэжыме спецаперацыі, употай ад кіраўніцтва самой партыі. «Нават члены кіроўных органаў партыі даведаліся пра гэта толькі за пару гадзін да таго, як гэта стала вядома - на супольным пасяджэнні вышэйшага і генеральнага саветаў, якое папярэднічала з'езду [Адзінай Расеі]», - сказалі два ўдзельнікі гэтага пасяджэння.

Перад з'ездам «Адзінай Расеі» Мядзведзеў спрабаваў нарасціць сваю публічную актыўнасць, гаворыцца ў артыкуле. Пік згадак Мядзведзева ў СМІ прыпаў на апошнія два-тры тыдні напярэдадні з'езду партыі. Для параўнання 1 лютага ў Мядзведзева было блізу 2,5 тысячы згадак у СМІ, а 1 чэрвеня - больш за 7,5 тысячы згадак, падлічылі журналісты. Пры гэтым за паўтара года пасля адстаўкі ўрада Мядзведзева на федэральных каналах не выйшла ніводнага інтэрв'ю з былым прэм'ер-міністрам.

Са слоў палітолага Канстанціна Калачава, Мядзведзеў «прыкладаў усе намаганні, каб нарасціць асабісты рэйтынг, у публічнай прасторы яго было шмат», аднак, мяркуючы з сацыялогіі, гэтых дзеянняў было недастаткова. «У Мядзведзева, як гэта называюць у боксе, быў бой з ценем. Але гэты цень меў канкрэтная прозвішча - Кірыенка», - ананімна сказаў паліткансультант, былы супрацоўнік адміністрацыі прэзідэнта.

«Кірыенка разумеў, што Мядзведзеў з яго антырэйтынгам - не лакаматыў, які б пацягнуў партыю ўверх. А за партыю ў канчатковым выніку адказвае менавіта ён. І з гэтай пазіцыі яму больш падыходзіў хтосьці яркі, не абцяжараны негатывам», - патлумачыла крыніца, блізкая да адміністрацыі прэзідэнта, якая ўдзельнічае ў падрыхтоўцы выбарчых кампаній федэральнага ўзроўню.

Пры гэтым апошняе слова ў пытанні лідараў спісу «Адзінай Расеі» было за Пуціным, адзначылі чатыры былыя чыноўнікі, якія ў розны час працавалі ў Крамлі. Са слоў федэральнага чыноўніка, пры выбары кандыдатаў Пуцін у тым ліку кіраваўся тым, каб не даваць падставы для размоў пра транзіт улады і патэнцыйных пераемнікаў.

У выніку Мядзведзеў не ўвайшоў у першую пяцёрку кандыдатаў «Адзінай Расеі». «Медуза» і «Руская служба ВВС» пісалі са спасылкай на крыніцы, што Мядзведзеў даведаўся пра тое, што не ўвайшоў у спіс «Адзінай Расеі» за некалькі дзён да з'езду партыі 19 чэрвеня. Пра гэта Мядзведзеву асабіста сказаў Пуцін. Суразмоўцы «Медузы»* таксама паведамлялі, што яшчэ ў пачатку тыдня Мядзведзеў разлічваў стаць спікерам Дзярждумы.

Пасля адстаўкі Мядзведзеў «залёг на дно» ў рэзідэнцыі ў Плесе Іванаўскай вобласці, там ён правёў большую частку часу падчас пандэміі каранавіруса, сцвярджаецца ў матэрыяле. Перыядычна Мядзведзеў жыў у рэзідэнцыі «Горкі-9» на Рублёўцы.

Мядзведзеў узначальваў агульнанацыянальны спіс «Адзінай Расеі» на выбарах у Дзярждуму ў 2016 і 2011 гадах.

У студзені 2020 года Мядзведзеў падаў у адстаўку з пасады старшыні ўрада праз дзве гадзіны пасля паслання Пуціна да Федэральнага сходу, на якім прэзідэнт анансаваў папраўкі да Канстытуцыі. Неўзабаве Мядзведзева прызначылі намеснікам старшыні Савета Бяспекі. Ён таксама застаецца кіраўніком «Адзінай Расеі».