Лукашэнку не дадуць выхаду да мора
- 15.09.2021, 16:04
Польшча блакуе будаўніцтва канала, які праходзіць праз Беларусь.
Польскі міністр клімату і навакольнага асяроддзя пад ціскам экалагічных арганізацый адклікаў раней выдадзены дазвол на будаўніцтва плаціны «Сяжава» на рацэ Вісла.
Як вынікае з пастановы міністра, раней падрыхтаваная ацэнка ўздзеяння праекта на навакольнае асяроддзе (АУНА) праведзеная са шматлікімі парушэннямі заканадаўства і не ўлічвала ўсіх аспектаў, адзначае выданне «Белорусы и рынок».
Гэты праект разглядаўся як ключавы ва ўладкаванні польскага адцінка воднага шляху Е40 (шлях злучае Балтыйскае і Чорнае мора па тэрыторыі Польшчы, Беларусі і Украіны).
У Сяжаве павінны былі даць старт узвядзенню каскада плацін, каб забяспечыць навігацыю, не ніжэйшую за IV клас суднаходства і стварыць новыя магутнасці ГЭС. Планы актыўна лабіяваліся дзяржаўным агенцтвам «Польскія Воды» (Wody Polskie).
Мінтранс Беларусі таксама разглядаў Е40 як праект, здольны ажывіць працу воднага транспарту, у тым ліку, які дае магчымасць задзейнічаць судны тыпу «рака-мора».
Пакуль жа грузаабарачэнне рачнікоў найменшае ў параўнанні з іншымі тыпамі транспарту ў Беларусі. У 2020 годзе, паводле звестак Белстата, паказчык склаў толькі 29,9 млн т.км або 0,024% ад сукупнага грузаабарачэння ў краіне.
На гэтым фоне афіцыйныя асобы Беларусі не раз заяўлялі пра жаданне пабудаваць уласны марскі флот класа «рака-мора». Апошні раз 12 верасня аб гэтым заявіў прэм'ер-міністр Беларусі Раман Галоўчанка.
Але, мабыць, цяпер гэтыя планы адкладуць на нявызначаны час. Аднак без каскадызацыі Віслы і будаўніцтва канала Вісла - Мухавец немагчымае паўнавартаснае сучляненне ўнутраных водных шляхоў Польшчы, Беларусі і Украіны ў рамка Е40.
Хоць і раней беларускія эколагі і прадстаўнікі дзелавой грамадскасці заклікалі адмовіцца ад будаўніцтва воднага шляху Е40 з прычыны высокіх экалагічных і інвестыцыйных рызык. На думку вядучых бізнэс-саюзаў, нават калі Е40 удасца рэканструяваць па IV класу суднаходства, водны транспарт і далей будзе саступаць чыгуначнаму і аўтамабільнаму ў ключавых лагістычных параметрах: цане, хуткасці, сезоннай устойлівасці дастаўкі.