У Аўстраліі хочуць прыняць «акт Магніцкага»

• 5.08.2021, 21:01

На гэты момант такі закон прыняты ў шасці краінах.

У Сенаце Аўстраліі захацелі прыняць праект «акта Магніцкага». Яго абмеркавалі ў рамках першага чытання. Пра гэта гаворыцца на сайце ведамства.

Калі ўрад Аўстраліі прыме закон, то ён зможа ўводзіць адрасныя санкцыі для барацьбы з парушэннямі правоў чалавека і карупцыяй. Прыняць «акт Магніцкага» рэкамендаваў Аб'яднаны пастаянны камітэт замежных спраў, абароны і гандлю парламента Аўстраліі яшчэ ў 2020 годзе, нагадвае Telegram-канал «Санкцыі. Экспертыза».

Закон быў названы ў гонар расейскага аўдытара Сяргея Магніцкага. Яго арыштавалі ў 2008 годзе. У 2009-м ён памёр у маскоўскім СІЗА «Матроская цішыня». На гэты момант такі закон прыняты ў шасці краінах. Яго аналагі таксама адобраны ў Эстоніі, Канадзе, Літве і Латвіі. У Вялікабрытаніі прынялі толькі частку закона - яна тычыцца замарозкі актываў тых, хто мае дачыненне да грубых парушэнняў правоў чалавека.