МЗС Літвы дапускае поўнае прыпыненне транзіту беларускага калію
- 4.08.2021, 14:38
Вільня ўнесла прапанову аб пашырэнні санкцый.
Міністр замежных спраў Літвы Габрыэлюс Ландсбергіс дапускае поўнае спыненне транзіту беларускіх калійных угнаенняў. З ягоных слоў, у Еўразвяз ужо накіраваныя прапановы ў пашырэнні сектаральных санкцый у дачыненні да беларускага рэжыму, паведамляе Delfi.
Ландсбергіс адзначыў, што санкцыі ЕЗ, уведзеныя ў чэрвені, ахопліваюць блізу 20% транзіту. Нагадаем, пад іх не трапіў хларыд калію са змяшчэннем аксіду калію ад 40% да 62%, які і з'яўляецца асноўным угнаеннем.
«Гэта азначае, што ёсць невялікі ўдар, але ён не распаўсюджваецца на ўвесь грузапаток. Цяпер Літва ўнесла прапанову аб пашырэнні санкцый - у тым ліку і сектаральных. Мы не згадалі, якія з іх з'яўляюцца канкрэтнымі, але, імаверна, лагічна зразумець, што гэты сектар, магчыма, таксама будзе ахоплены. Гэта азначае, што будуць дададзеныя новыя калійныя ўгнаенні і што грузапаток будзе змяншацца», - сказаў ён журналістам.
Пазней ён быў больш канкрэтны, дапусціўшы поўнае прыпыненне паставак.
«Магчымае поўнае спыненне. Я б сказаў, што так, гэта рэальна. Рэальныя перамовы яшчэ не пачаліся, таму яшчэ рана пра гэта казаць», - сказаў ён.