У турэцкім Бодруме ўспыхнулі новыя пажары: фота і відэа
- 31.07.2021, 19:24
Турыстаў і мясцовых эвакуююць.
Паблізу турэцкага курортнага горада Бодрума ў раёнах Кумбахчэ і Гюмбет у суботу, 31 ліпеня, успыхнулі новыя пажары. У сувязі з гэтым ратавальнікі эвакуююць жыхароў і турыстаў.
Як паведамляе CNN Türk (пераклад - nv.ua), пажар пачаўся каля трасы Кумбахчэ-Махалесі-Ічмелер. Праз вецер агонь хутка распаўсюдзіўся ў бок горада.
На месца прыбыла вялікая колькасць пажарных, яны спрабуюць перашкодзіць стыхіі падабрацца да жылых дамоў, размешчаных у 150 метрах ад месца пажару.
У якасці захаду засцярогі ўлады пачалі эвакуацыю турыстаў з гатэляў і жыхароў дамоў у рэгіёне. Людзей вывозяць з боку мора на выратавальных лодках і лодках берагавой аховы.
Прычына ўзгарання пакуль невядомая.
Як паведамлялася, на поўдні Турцыі 28 ліпеня ўспыхнулі маштабныя лясныя пажары. Напрыклад, агонь зачапіў папулярныя курортныя гарады Мармарыс, Бодрум і Анталію. У выніку пажараў загінулі шэсць чалавек, шпіталізаваныя - 58.
На раніцу суботы, 31 ліпеня, заставалася лакалізаваць яшчэ 10 ачагоў узгарання.