Вялікая Брытанія ўвяла санкцыі супраць беларускага прадпрыемства, звязанага з вайсковай сферай

• 23.07.2021, 17:44

Лондан увёў абмежавальныя захады супраць ААТ «Агат - электрамеханічны завод».

21 ліпеня Вялікая Брытанія абнавіла санкцыйны спіс у дачыненні да беларускага рэжыму і дадала туды ААТ «Агат - электрамеханічны завод». Гэта паказанае ў паведамленні Офіса выканання санкцый Казначэйства Вялікай Брытаніі.

Раней санкцыі Вялікай Брытаніі распаўсюджваліся на ААТ «АГАТ-Сістэм», але 8 ліпеня прадпрыемства выключылі з санкцыйнага спісу.

Як і «АГАТ-Сістэм», «Агат - электрамеханічны завод» уваходзіць у холдынг «Геаінфармацыйныя сістэмы кіравання» з кіроўнай кампаніяй ААТ «АГАТ-сістэмы кіравання». Прадпрыемства выпускае прадукцыю спецыяльнага прызначэння (радыёрэлейныя станцыі, мабільныя вузлы сувязі, рухомыя пункты аўтаматызаванага кіравання лятальнымі апаратамі, перасоўныя камандныя пункты аператыўна-тактычнага камандавання ВПС і войскаў СПА) і вытворча-тэхнічнага прызначэння (камплектуючыя для машынабудаўнічай галіны).