Financial Times: Новы пакет санкцый ЕЗ закрые апошнія шчыліны для Лукашэнкі

• 23.06.2021, 20:26

Лідары ЕЗ папярэдне ўзгаднілі пяты пакет санкцый.

Новы пакет санкцый Еўразвязу супраць Беларусі закрые "апошнія шчыліны" для рэжыму Аляксандра Лукашэнкі за прымусовую пасадку самалёта Ryanair ў Менску і арышт апазіцыйнага журналіста Рамана Пратасевіча. Лідары ЕЗ папярэдне ўзгаднілі абмежавальныя меры.

Пра гэта паведаміла газета Financial Times са спасылкай на дыпламатычныя крыніцы.

Са слоў суразмоўцаў выдання, санкцыйны пакет яшчэ мае патрэбу ў юрыдычнай дапрацоўцы, і дэталі абмежавальных мер застаюцца канфідэнцыйнымі да публікацыі. Дыпламаты адзначылі, яго мэта - узмацніць ціск на дзяржаўныя кампаніі Беларусі і пазбавіць рэжым буйных крыніц даходаў.

Крыніцы газеты адзначаюць, што плануецца ўвесці фінансавыя санкцыі, якія прадугледжваюць, у тым ліку, забарону на гандаль каштоўнымі паперамі, доступ да грашовага рынку і замежнага крэдытавання. Таксама прапануецца забараніць уклады прыватных банкаў, гуманітарныя аперацыі і некаторыя мясцовыя праекты.

Прапанаваны пакет ЕЗ таксама ўключае ў сябе тытунёвую прамысловасць Беларусі і закрывае тое, што адзін з дыпламатаў назваў "апошнія шчыліны" у існым эмбарга на пастаўкі зброі, уключаючы спыненне экспарту высокадакладных стрэльбаў, якія выкарыстоўваюцца біятланістамі.

У чацвёрты пакет санкцый супраць Беларусі гэтыя прапановы не ўвайшлі праз пазіцыю Аўстрыі.