Былы мэр Віцебска, чые сыны ўдзельнічалі ў пратэстах, стаў дырэктарам хімчысткі

• 23.06.2021, 10:20

Чыноўнік быў прызначаны на новую пасаду 1 красавіка.

Былы старшыня Віцебскага гарвыканкама Вадзім Заранкін цяпер займае пасаду дырэктара хімчысткі – ААТ "Аб'яднанне Лотас", паведамляюць "Народныя навіны Віцебска".

На сайце адкрытага акцыянернага таварыства дырэктарам цяпер значыцца Заранкін Вадзім Уладзіміравіч. На гэтай пасадзе ён змяніў 73-гадовага Юрыя Галыкіна, які кіраваў аб'яднаннем, падпарадкаваным Галоўнай управе гандлю і паслуг Віцебскага аблвыканкама, яшчэ з 2000 года.

2020 год пры Галыкіну ААТ "Аб'яднанне Лотас" закончыла з чыстым прыбыткам 53 000 рублёў. 24 000 рублёў выплацілі на дывідэнды, яшчэ 1000 рублёў паклалі ў інвестфонд.

Мяркуючы з запісаў у рэестры, Вадзім Заранкін быў прызначаны на новую пасаду 1 красавіка 2021, г.зн. праз два месяцы пасля сыходу з пасады мэра. Прынамсі гэтым днём датуецца апавяшчэнне аб прызначэнні (замене) кіраўніка ААТ "Аб'яднанне Лотас".

Нагадаем, што Вадзім Заранкін кіраваў Віцебскам роўна год. Пасля ягонага сыходу крэсла мэра заставалася вакантным чатыры з паловай месяцы, нядаўна старшынёй Віцебскага гарвыканкама Лукашэнка прызначыў Мікалая Арлова.