Салігорскі «Шахцёр» хацеў згуляць матч ЛЧ у Бялградзе, але цяпер туды не лётаюць беларускія самалёты

• 21.06.2021, 15:26

Паедуць на аўтобусе?

Сербія, Чарнагорыя, Нарвегія і іншыя краіны далучыліся да авіябайкоту Беларусі.

Некаторыя краіны-кандыдаты на ўступленне ў Еўразвяз, а таксама дзяржавы-чальцы Еўрапейскай асацыяцыі свабоднага гандлю (ЕАСГ) далучыліся да пастановы ЕЗ аб забароне на допуск у сваю паветраную прастору і аэрапорты самалётаў беларускіх авіякампаній.

Краіны-кандыдаты, напрыклад, Паўночная Македонія, Чарнагорыя, Сербія і Албанія, а таксама такія краіны ЕАСГ, як Ісландыя, Ліхтэнштэйн і Нарвегія, чальцы Еўрапейскай эканамічнай зоны, далучаюцца да пастановы Рады ЕЗ, - гаворыцца ў прэс-рэлізе за подпісам афіцыйнага прадстаўніка кіраўніка дыпламатыі ЕЗ Петэра Станы.

У дакуменце адзначаецца, што пералічаныя вышэй краіны забяспечаць «адпаведнасць сваёй нацыянальнай палітыкі гэтай пастанове Рады».

Чэмпіён краіны «Шахцёр», у сваю чаргу, збіраўся правесці першы хатні матч Лігі чэмпіёнаў не ў Беларусі, паведамляе «Прессбол».

Паводле інфармацыі беларускіх СМІ, баўгарскі «Лудагорац» гарнякі хацелі прыняць у Бялградзе.

У сталіцы Сербіі ёсць як мінімум пяць стадыёнаў, якія адказваюць патрабаванням УЕФА для першых раундаў еўракубкаў: «Партызан», «Райка Міціч», «Амладзінскі», «Чукарычкі», «Абіліч».