Улады рыхтуюцца да перабояў з палівам на беларускіх АЗС?

• 6.05.2021, 17:57

Мазырскі НПЗ сыходзіць на рамонт у чэрвені, а не ў траўні.

Скарачэнне паставак, пра якое кажуць у «Транснафце», звязвалі з планавым капрамонтам, які ў траўні павінен быў пачацца на Мазырскім НПЗ. Аднак капрамонт ссоўваецца на два тыдні - і замест 15 траўня пачнецца 1 чэрвеня, паведамляе «Еўрарадыё».

- Сёлета капрамонт будзе з 1 чэрвеня, - кажа намеснік генеральнага дырэктара ў ідэалагічнай працы, персаналу і сацыяльнаму развіццю Мазырскага НПЗ Генадзь Цецярук. - Усе дамовы на пастаўку нафтапрадуктаў будуць выкананыя, як і папярэднія чатыры месяцы, і мы не сарвём паставак.

Перанос рамонту можа быць звязаны з чуткамі, што «Нафтан» у траўні атрымае ўсяго 50 тысяч тон нафты (у красавіку было 600 тысяч тон). А адначасовая недазагрузка «Нафтана» і прыпыненне Мазырскага НПЗ на рамонт пагражаюць перабоямі з палівам на беларускіх АЗС. Улады адмаўляюць магчымасць такога павароту падзей.