ЗША нагадалі кіраўніку МЗС Нямеччыны пра сваю пазіцыю што да «Паўночнай плыні-2»

• 4.05.2021, 20:45

Вашынгтон рашуча выступае супраць будаўніцтва газаправода.

Дзяржсакратар ЗША Энтані Блінкен падчас сустрэчы ў Лондане з кіраўніком МЗС ФРГ Хайка Маас нагадаў, што Вашынгтон «рашуча выступае» супраць будаўніцтва газаправода «Паўночная плынь-2». Пра гэта паведаміла прэс-служба Дзярждэпу.

«Дзяржсакратар заявіў, што адміністрацыя ЗША выступае рашуча супраць газаправода «Паўночная плынь-2», - гаворыцца ў паведамленні.

Таксама ў Дзярждэпе паведамілі, што падчас сустрэчы Блінкен і Маас адзначылі важнасць трансатлантычнага партнёрства перад тварам «дэстабілізуючай дзейнасці Расеі, Кітая і Ірана».

У сакавіку Блінкен ужо абмяркоўваў з Маас «Паўночную плынь-2» і адзначаў, што Вашынгтон выступае супраць яго запуску.

З 1 студзеня 2021 года ўвайшлі ў дзеянне новыя санкцыі, прынятыя кангрэсам ЗША ў дачыненні да праекта газаправода. Між іншым, яны прадугледжваюць забарону на ўдзел у праекце кампаній, якія падаюць страхавыя і сертыфікацыйныя паслугі.