Кіраўнік Мінэнэрга Украіны заклікаў да забароны імпарту электраэнэргіі з Беларусі

• 18.05.2021, 15:49

Гэты імпарт супярэчыць стратэгічным мэтам Украіны.

Міністр энэргетыкі Украіны Герман Галушчанка звярнуўся з лістом да кіраўніка Нацыянальнай камісіі, якая ажыццяўляе дзяржаўнае рэгуляванне ў сферах энэргетыкі і камунальных паслуг (НКРЭКУ), Валерыя Тарасюка з просьбай забараніць імпарт электраэнэргіі з Расеі і Беларусі.

Адпаведную інфармацыю unian.net паведамілі ў прэс-службе Міністэрства энэргетыкі.

Адзначаецца, што міністр звярнуўся да рэгулятара з такой просьбай на падставе Закона «Аб унясенні змяненняў у некаторыя заканадаўчыя акты Украіны аб сертыфікацыі аператара сістэмы перадачы», які Вярхоўная Рада прыняла 15 красавіка 2021 года.

«Гэта (імпарт - заўв.) супярэчыць стратэгічным мэтам Украіны ў сферы энэргетыкі (зрэшты, сінхранізацыі Аб'яднанай энэргетычнай сістэмы Украіны з ENTSO-E) і патэнцыйна пагражае энэргетычнай бяспецы», - цытуе прэс-служба ліст кіраўніка Мінэнэрга.

Паводле інфармацыі прэс-службы, ключавым патрабаваннем пры далучэнні энэргасістэмы Украіны да ENTSO-E з'яўляецца забеспячэнне дастатковасці ўласных генерыруючых магутнасцеяў для выканання прагназаванага попыту на электрычную энэргію. Прыцягненне імпарту электраэнэргіі пагаршае фінансава-эканамічнае становішча вытворцаў электрычнай энэргіі і, адпаведна, якасць і паўнату выканання зацверджаных Мінэнэрга графікаў рамонтаў генерыруючага абсталявання электрастанцый і цеплаэлектрацэнтраляў.