Затрыманыя жонка і сын заснавальніка сеткі крам «Хатні»
- 23.04.2021, 15:17
Сам бізнэсовец знаходзіцца за межамі Беларусі.
У гісторыі закрыцця крамаў «Хатні» паўстаў новы паварот. На мінулым тыдні былі затрыманыя жонка і старэйшы сын Івана Беразоўскага. Сам заснавальнік сеткі знаходзіцца за межамі Беларусі. Пра гэта tut.by распавялі тры не звязаныя адна з адной крыніцы.
Паводле звестак суразмоўцаў, распачатая крымінальная справа на падставе арт.209 КК (махлярства). Заснавальнікаў і топ-мэнэджараў сеткі падазраюць у завалодванні маёмасцю шляхам падману альбо злоўжывання даверам.
- Камень сутыкнення - запазычанасці Беразоўскага перад банкамі, прыватнымі і дзяржаўнымі пастаўшчыкамі, партнёрамі, работнікамі. Яго просяць выплаціць пазыкі і тады выпусцяць сваякоў. Ён сцвярджае, што ўсё адразу выплаціць не можа, - распавядаюць крыніцы.
Паводле інфармацыі tut.by, жонку і сына Беразоўскага затрымалі на мінулым тыдні, калі сілавікі наведваліся ў галаўны офіс «НП-Сэрвісу», буйнога дыстрыбутара тавараў паўсядзённага попыту. Гэтая кампанія ўважаецца за падкантрольную заснавальніку сеткі крам «Хатні».
Сам Беразоўскі недаступны для каментароў. Ягонае месцазнаходжанне невядома. Крыніцы tut.by ў сувязі з гэтым успамінаюць выпадак з 2018 года. Тады сілавікі падазравалі «НП-Сэрвіс» ва ўхіленні ад выплаты падаткаў. Беразоўскі адзін час быў у Лондане, але потым вярнуўся ў Беларусь і развязаў пытанні. У Следчым камітэце паведамілі, што ўладальнік «НП-Сэрвісу» кампенсаваў выяўленую шкоду ў справе, таму яго не бралі пад варту, а ўзялі абавязацельства аб прыходзе.
Іван і Святлана Беразоўскія – аднагодкі, нарадзіліся ў 1972 годзе. Пачыналі свой бізнэс у 90-х у якасці індывідуальных прадпрымальнікаў, гандлюючы на рынку ў Ждановічах. З часам сталі буйнымі імпарцёрамі прадуктаў харчавання, а затым уладальнікамі камерцыйнай нерухомасці. Муж і жонка заўсёды вялі непублічны лад жыцця.
Гісторыя крам «Хатні» пачалася з 3 лютага 2016 года, калі быў адкрыты першы супермаркет у Менску. На піку поспеху сетка налічвала больш за 75 крам у розных гарадах Беларусі.
У лютым 2021 года многія крэдыторы настроіліся на «Хатні». Пастаўшчыкі паведамлялі аб запазычанасцях на сотні тысяч рублёў. У адказ на гэта аператар стаў закрываць стратныя крамы, рэарганізоўваць свой бізнэс шляхам выдзялення 16 кампаній і весці перамовы з новымі інвестарамі. У гэты ж час сітуацыяй зацікавіліся сілавікі, пастаўшчыкоў сталі выклікаць у ДФР, распавялі інфармаваныя крыніцы.
Атрымаць каментар у ДФР не ўдалося.
У ліку пацярпелых апынуліся і шэраг работнікаў крам «Хатні», якія паскардзіліся, што іх не могуць звольніць і разлічыць.
Прадстаўнік рытэйлера не адказаў на тэлефонныя званкі.
Паводле звестак рэсурсу kartoteka.by, ключавыя юрыдычныя асобы аператара «Гама рытэйл», «Прэм'ер Маркет», «Пантапалеа», «Семела» і іншыя з 12 красавіка знаходзяцца ў ліквідацыі.
Варта адзначыць, што «Прэм'ер Маркет» і «Гама рытэйл» з'яўляюцца эмітэнтамі аблігацый. У Мінфіне сказалі officelife, што паручальнікі ў аблігацыях «Гама рытэйл» цалкам выконваюць пакладзеныя патрабаванні. Пры гэтым, у міністэрстве дадалі, што не валодаюць правам «публічна ацэньваць надзейнасць эмітэнтаў».
Паручыцелямі ў аблігацыях «Гама рытэйл» выступаюць «Торгразвіццё», «Прэм'ер Маркет», «Універсам «Цэнтральны», з якіх не ліквідуецца цяпер толькі апошняя юрыдычная асоба. Пры гэтым сам універсам закрыты і шукае новага гаспадара. «Гама рытэйл» жа выступае паручыцелем у «Прэм'ер Маркета». Варта таксама адзначыць, што да пастановы аб масавай ліквідацыі з названых кампаній выдзяляліся новыя юрыдычныя асобы.
Аблігацыі ёсць і ў «НП-Сэрвісу». Але кампанія не можа пахваліцца добрымі фінансавымі вынікамі. За 2020 год прыбытак дыстрыбутара вырас з 62,4 мільёнаў рублёў да 70,7 мільёнаў рублёў. Пры гэтым курсавыя розніцы, пазыкі і іншыя выдаткі прывялі да чыстай страты на амаль 13,9 мільёнаў рублёў.