Аварыйна спыненыя цэхі на «Гродна Азоце» не працуюць ужо дзень

• 20.04.2021, 16:33

Іх дагэтуль не запусцілі.

Аварыйна спыненыя цэхі на «Гродна Азоце» яшчэ не запусцілі, яны стаяць ужо дзень. Пра гэта tut.by распавялі працаўнікі прадпрыемства. «Аміяк-4», як абяцалі раней, дагэтуль ужо павінен быў аднавіць працу, потым павінны былі запусціць і «Карбамід-4».

Інфармацыя аб праблемах у працы некалькіх цэхаў на «Гродна Азоце» - «Аміяк-4», «Капралактам-2» і «Карбамід-4» - з'явілася ўдзень у панядзелак, 19 красавіка. Гарадзенцы заўважылі спачатку факел над адным з цэхаў, а потым густы белы дым, які ішоў з адной з труб прадпрыемства. «Гродна Азот» афіцыйна паведаміў, што а 14.35 адбылося пазапланавае прыпыненне абсталявання цэха «Аміяк-4» у выніку памылковых дзеянняў персаналу электрацэха. «Аміяк-4», абяцалі, адновіць сваю працу цягам дня, потым запусцяць і «Карбамід-4». Але праз дзень цэхі не запрацавалі.

Учора гарадзенцы заўважылі над адным з цэхаў вогненны факел, а потым - густы белы дым. У тэлеграм-канале «Страйкам Азоту» паведамілі, што спыніўся цэх «Аміяк-4», у цэху «Капралактам-2» перасталі працаваць усе помпы, таксама стаіць «Карбамід-4».

На афіцыйным сайце прадпрыемства з'явілася інфармацыя, што на заводзе адбылося пазапланавае прыпыненне абсталявання цэха «Аміяк-4» праз памылковыя дзеянні персаналу электрацэха пры выкананні работ планавага абслугоўвання. Праз гэта таксама спыніўся цэх «Карбамід-4» - яны тэхналагічна звязаныя адзін з адным.

«Аміяк-4», паабяцалі ўчора ў адміністрацыі, адновіць сваю працу цягам дня, потым запусцяць і «Карбамід-4».

На 16.00 аўторка, 20 красавіка, спыненыя цэхі ўсё яшчэ не працавалі, паведамілі працаўнікі прадпрыемства.