Медыкі расказалі, як аздаравіць сэрца

• 8.03.2021, 14:00

Самы просты і эфектыўны спосаб – унясенне змяненняў у штодзённае меню.

Кардыёлаг Нана Пагосава агучыла lenta.ua рэкамендацыі, за кошт якіх можна аздаравіць сваё сэрца. Нават у пандэмію сэрцава-судзінныя хваробы застаюцца ключавой прычынай смерці ў свеце.

Самы просты і эфектыўны спосаб – унясенне змяненняў у штодзённае меню. Экспертка рэкамендуе ўключыць туды рыбу, пажадана мець хоць бы 2 ці 3 порцыі цягам тыдня, а выбіраць тлустыя віды.

Лекарка раіць займець звычку штодня з'ядаць хоць бы 500 грамаў гародніны і садавіны, а яшчэ для сэрцава-судзіннай сістэмы важныя бабовыя. У іх утрымліваюцца вялікія аб'ёмы клятчаткі, вітамінаў і раслінных бялкоў. Калі ўжываць прадукт рэгулярна, можна дамагчыся зніжэння ўзроўню «дрэннага» халестэрыну і глюкозы ў крыві.

Складаныя вугляводы забяспечваюць больш доўгае адчуванне сытасці і спрыяюць нармальнай працы кішачніка. Знайсці іх можна ў крупах, кукурузе, садавіне і хлебе. Пагосава раіць адмовіцца ад ежы за 2-3 гадзіны да сну, паколькі вялікая колькасць калорый на вячэру павышае рызыку атлусцення.