Польскія памежнікі адбілі 51 спробу прарваць мяжу з боку Беларусі
- 8.12.2021, 12:31
Мігранты з Ірака пайшлі на начны штурм пад кіраўніцтвам беларускіх сілавікоў.
За суткі на мяжы Польшчы з Беларуссю была зафіксаваная 51 спроба яе незаконнага перасячэння.
Пра гэта паведаміла Памежная служба Польшчы.
Польскія памежнікі вынеслі 6 пастаноў аб выдварэнні нелегальных мігрантаў з тэрыторыі краіны.
На адцінку, які ахоўваецца польскай памежнай заставай у Чарэмшы, група з 35 чалавек, у асноўным грамадзяне Ірака, сілай штурмавалі мяжу. Усе яны былі затрыманыя.
Нагадаем, што 8 лістапада рэжым Лукашэнкі зладзіў маштабную правакацыю на польскай мяжы. Тысячы мігрантаў пад кантролем беларускіх спецслужбаў штурмавалі мяжу Польшчы. Польскі бок паведамляе, што ў наступных штурмах мяжы могуць узяць удзел да 10 тысяч нелегалаў.
15 лістапада беларускія вайскоўцы сагналі нелегалаў пад канвоем з іх лагера на мяжы з Польшчай да КПП "Брузгі-Кузніца".
16 лістапада мігранты пайшлі на штурм польскай мяжы.
Пасля гэтага мігрантаў размясцілі ў лагістычным цэнтры "Брузгі" на мяжы. Польская разведка паведаміла, што беларускія сілавікі ператварылі цэнтр "Брузгі" ў базу для нападаў мігрантаў на Польшчу.
26 лістапада Лукашэнка пабываў у лагеры мігрантаў, каб узняць іх на новы штурм польскай мяжы.
1 снежня беларускія спецслужбы абстралялі польскі прымежны горад Тэрэспаль. Абстрэлам былі знішчаны асвятляльныя мачты на мяжы з Беларуссю.