Беларускім банкам і кампаніям перакрылі плацяжы ў далярах і еўрах
- 5.12.2021, 22:54
Санкцыі супраць фінансавага сектару Беларусі пачалі працаваць.
Учора стала вядома, што ўкраінскі ОТП Банк разаслаў сваім кліентам папярэджанне пра тое, што нямецкі Deutsche Bank не будзе праводзіць плацяжы ў далярах і еўрах у беларускія банкі.
Выданне «Інфабанк» паведамляе, што такая самая інфармацыя прыйшла і ў МТБанк.
Пад абмежаванне патрапілі банкі, якія знаходзяцца ў дзяржаўнай уласнасці, а таксама кампаніі, якія знаходзяцца ў дзяржаўнай уласнасці і ўсе звязаныя з імі асобы.
Вось спіс з гэтага ліста:
«...Deutsche Bank спыняе правядзенне плацяжоў у далярах і еўрах, як ад, так і ў дачыненні да наступных катэгорый контрагентаў:
Банкі, якія знаходзяцца ў дзяржаўнай уласнасці Рэспублікі Беларусь
Кампаніі, якія знаходзяцца ў дзяржаўнай уласнасці Рэспублікі Беларусь
Публічныя дзеячы Рэспублікі Беларусь
Любыя асобы, якія звязаныя з вышэйназванымі катэгорыямі…»
Мы ўжо раней пісалі, што беларускія банкі мянялі карэспандэнцкія рахункі і адкрывалі іх у іншых банках, як правіла расейскіх. Беларускія банкіры прадбачылі такое развіццё падзеяў.
Прычым закрывалі рахункі менавіта ў нямецкім банку:
«...Апошнім часам беларускія банкі сталі мяняць карэспандэнцкія рахункі ў замежных банках».
Банк Дабрабыт апавясціў кліентаў у навіне на сайце:
Белаграпрамбанк навіну не апублікаваў, а проста апавясціў кліентаў у рассылцы. Інфармацыя пра гэта з'явілася ў сетцы інтэрнэт:
Санкцыі ўсё больш і больш ускладняюць жыццё беларускім банкірам, яны пачалі шукаць альтэрнатыўных партнёраў, Белаграпрамбанк, напрыклад, актыўна заключае дамовы пра супрацоўніцтва з узбекскімі банкамі.
Нагадаем, што ЕЗ, ЗША, Канада і Вялікая Брытанія ўвялі новыя санкцыі супраць рэжыму Лукашэнкі. Таксама 8 снежня набудуць моц эканамічныя санкцыі ЗША, прынятыя ў жніўні.