ЗША ўвялі санкцыі супраць сына Лукашэнкі
- 2.12.2021, 18:35
Абмежаванні закранулі 20 чалавек, 12 арганізацый і тры самалёты.
Злучаныя Штаты ўвялі новыя санкцыі супраць рэжыму Лукашэнкі, паведамляецца на сайце Мінфіна ЗША. Абмежаванні закранулі 20 чалавек, 12 арганізацый і тры самалёты.
Пад санкцыі патрапілі:
сярэдні сын дыктатара Дзмітрый Лукашэнка. Ён займае пасаду старшыні цэнтральнай рады «Прэзідэнцкага» спартовага клуба» і з'яўляецца чальцом Нацыянальнага алімпійскага камітэта Беларусі;
начальнік Галоўнага ўпраўлення ў барацьбе з арганізаванай злачыннасцю і карупцыяй (ГУБАЗіК) МУС Беларусі Андрэй Паршын;
муж экс-прэс-сакратаркі МУС Беларусі Вольгі Чамаданавай Дзяніс Чамаданаў;
намеснік міністра ўнутраных спраў Дзмітрый Карзюк;
кіраўнік Дзяржаўнага памежнага камітэта Беларусі Анатоль Лапо;
ягоны першы намеснік Ігар Буткевіч і намеснікі Сяргей Новікаў і Ігар Печань;
экс-старшыня Федэрацыі хакея Беларусі, сябра Савета Рэспублікі Нацыянальнага сходу, які падазраецца ў забойстве Рамана Бандарэнкі Дзмітрый Баскаў і іншыя.
Акрамя таго, ЗША ўвялі санкцыі супраць дзяржаўнай пазыкі Беларусі, забараніўшы амерыканскім грамадзянам аперацыі з "новымі пазыковымі абавязаннямі" з тэрмінам выплаты больш за 90 дзён і выпушчанымі 2 снежня ці пазней.
Улады Вялікабрытаніі і Канады абвясцілі аб тым, што далучаюцца да ўведзеных Еўрапейскім звязам і ЗША рэстрыкцыяў у дачыненні да рэжыму Лукашэнкі.