Латвія ўвяла абавязковую вакцынацыю
- 4.11.2021, 18:24
Прышчапіцца павінны ўсе працаўнікі.
Сойм Латвіі прыняў папраўкі да закона аб кантролі за распаўсюджваннем COVID-19, якія прадугледжваюць, што работнікі павінны зрабіць прышчэпку да 15 лістапада.
Пра гэта піша Delfi.
Закон прадугледжвае, што калі працадаўца паінфармаваў работніка аб тым, што для выканання працоўных абавязкаў неабходны «ковідны сертыфікат» (пацвярджае факт вакцынацыі або перанесенага захворвання), то работнік абавязаны пачаць вакцынацыю не пазней за 10 працоўных дзён з моманту атрымання інфармацыі.
Зрабіць другую прышчэпку трэба не пазней сёмага дня пасля паказанага ў інструкцыі прэпарата найкарацейшага тэрміна завяршэння працэсу вакцынацыі.
Калі работнік не пачне ці не скончыць працэс вакцынацыі да 15 лістапада, то працадаўца будзе мець права адхіліць яго ад выканання абавязкаў.
Пры гэтым закон пакідае магчымасць перавесці такога работніка на іншую пасаду або даць магчымасць працаваць аддалена датуль, пакуль той не атрымае сертыфікат.
Калі работнік не мае магчымасці працаваць аддалена ці не згодны пераходзіць на іншую пасаду, працадаўца мае права адхіліць яго ці адправіць у адпачынак без захавання заробку. Пры гэтым у прыватным сектары працадаўца ўсё ж можа захоўваць адхіленаму супрацоўніку заробак. У дзяржсектары такога права працадаўца не мае.
Тэрмін адхілення працаўніка ад пасады не можа перавышаць трох месяцаў. Тэрмін можна спыніць у момант, калі працаўнік атрымае сертыфікат.
Калі пасля трох месяцаў адхілення або прастою з віны работніка той без уважлівай прычыны не атрымае сертыфіката, то работадаўца атрымлівае права неадкладна перапыніць з ім працоўныя дачыненні. У гэтым выпадку будзе выплачана дапамога сумаю аднаго месячнага заробку.
Больш жорсткія нормы распаўсюджваюцца на вайскоўцаў Нацыянальных узброеных сіл. Калі вайсковец без уважлівай прычыны не атрымаў сертыфікат, міністр абароны або ўпаўнаважаны ім камандзір мае права скасаваць дамову аб службе. Тое самае датычыцца цывільных асоб, працаўладкаваных у структурах узброеных сіл.