Беларускія вайскоўцы арганізавалі яшчэ 125 нападаў мігрантаў на польскую мяжу
- 28.11.2021, 10:48
Найбольш разлютаваныя штурмы адбыліся ўночы каля Дубічаў-Царкоўных і Мельніка.
За дзень мяжу Польшчы спрабавалі незаконна перайсці з боку Беларусі 125 разоў. Мігранты дзейнічалі пад кіраўніцтвам і пры дапамозе беларускіх карнікаў.
Пра гэта паведамляе Памежная служба Польшчы.
У дачыненні да 51 замежніка супрацоўнікі Памежнай службы Польшчы вынеслі пастанову аб выгнанні з тэрыторыі краіны.
Групы па некалькі дзясяткаў мігрантаў спрабавалі жывасілам праткнуцца на адцінак стражніц у Дубічах-Царкоўных і Мельніку.
Нагадаем, што 8 лістапада рэжым Лукашэнкі зладзіў маштабную правакацыю на польскай мяжы. Тысячы мігрантаў пад кантролем беларускіх спецслужбаў штурмавалі мяжу Польшчы. Польскі бок паведамляе, што ў наступных штурмах мяжы могуць удзельнічаць да 10 тысячаў нелегалаў.
15 лістапада беларускія вайскоўцы сагналі нелегалаў пад канвоем з іх лагера на мяжы з Польшчай да КПП "Брузгі-Кузніца".
16 лістапада мігранты пайшлі на штурм польскай мяжы.
Пасля гэтага мігрантаў размясцілі ў лагістычным цэнтры "Брузгі" на мяжы. Польская выведка паведаміла, што беларускія сілавікі ператварылі цэнтр "Брузгі" ў базу для нападаў мігрантаў на Польшчу.
26 лістапада Лукашэнка пабываў у лагеры мігрантаў, каб падняць іх на новы штурм польскай мяжы.