Расейскі рубель рэкордна ўпаў за чатыры месяцы
- 27.10.2021, 18:09
Гэта здарылася пасля вялікіх выплат "Роснефть".
Палёт расейскага валютнага рынку, які апусціў курсы даляра і еўра да мінімуму з лета 2020 года, абарваўся на таргах у сераду, паведамляе finanz.ru.
Рубель патаннеў максімальна з пачатку ліпеня пасля таго, як вялікія прадаўцы валюты сышлі з рынку, а попыт на яе моцна падскочыў.
Даляр, які падаў напярэдадні да 69,21 рубля і пачаў таргі серады на адзнацы 69,5675 да 13.05 падаражэў да 70,3950 рубля (1,28% да закрыцця сесіі ў аўторак).
Еўра, якое ледзь не прабіла ўзровень 80 рублёў напярэдадні, каштуе 81,57 рубля, фіксуючы рост курсу на 1,2%.
Рэкорднае за паўтара года ўмацаванне рубля ў кастрычніку арганізавалі экспарцёры, якія прадавалі валюту пад падатковыя выплаты, якія сёлета маюць стаць другімі маштабамі з пачатку года. Акрамя таго, адбіліся прамежкавыя дывідэнды на 338 млрд рублёў, пад якія сыравінным карпарацыям спатрэбілася прадаць дадаткова 1,4 млрд даляраў, ацэньвае галоўны інвестыцыйны стратэг ITI Capital Іскандэр Луцко.
Больш за палову гэтай сумы прыпадае на "Роснефть", якая 25 кастрычніка пералічыла акцыянерам 191 млрд рублёў.
Але цяпер падатковы перыяд закончыўся, прапанова валюты скарачаецца, а попыт на яе павысіўся на фоне прывабных курсаў, адзначае аналітык Сбербанк CIB Юрый Папоў.
Калі ў панядзелак і аўторак агульны аб'ём заявак на продаж даляраў з разлікамі "заўтра" на маскоўскай біржы дасягаў 150-200 тысяч лотаў і вышэй, то ў сераду прапанова сціснулася ў разы - блізу 57 тысяч лотаў на пачатак трэцяй гадзіны асноўных таргоў.
Колькасць заявак на куплю амэрыканскай валюты амаль у чатыры разы перасягае колькасць ордэраў ад прадаўцоў - 3405 супраць 964.
Попыт на валюту можа зыходзіць ад замежных трымальнікаў расейскіх акцый, якія канвертуюць дывідэнтныя выплаты, каб вывесці іх у свае юрысдыкцыі. Нарэшце, на выхад могуць сабрацца замежныя інвестары ў расейскія дзяржаўныя аблігацыі, якія строма падаюць пасля нечакана імклівага павышэння ключавой стаўкі ЦБ РФ у пятніцу (з 6,75% да 7,5% гадавых).
Глабальныя інвестары асцерагаюцца інфляцыі, за якой можа адбыцца ўзмацненне грашовай палітыкі ў ЗША. 10-гадовыя інфляцыйныя чаканні ў Штатах на падставе цаны дзяржаўных аблігацый дасягнулі 2,7% і абнавілі шматгадовыя рэкорды. Гэта "можа прычыніцца да ўзмацнення рыторыкі ФРС на наступным тыдні", папярэджвае Папоў.
Тым не менш, рубль яшчэ можа паказаць максімальны рост у канцы года, мяркуе Луцко: "Гэта вынікае са справаздачнасці вядучых глабальных банкаў, якія бачаць добрыя магчымасці ўгод кэры-трэйд з расейскай валютай і чакаюць далейшага падаражэння сыравіны".
Глабальны рухач рубля - павышэнне цаны нафты і газу напярэдадні зімовага ацяпляльнага сэзону і перспектывы росту Brent да 90 даляраў за барэль і вышэй, аптымістычны Луцко: «Павышэнне кошту вуглевадародаў павялічыць прыток валюты ў выглядзе экспартнага даходу, асабліва ў выпадку газу, бо стэрылізацыя экспартнага даходу Мінфінам у рамках бюджэтнага правіла пры гэтым значна меншая, чым у выпадку нафты - блізу 30% у параўнанні з 80%».
Зрэшты, не варта забываць, што моцны рубль нявыгадны ўраду з пункту гледжання напаўнення бюджэту, адзначае прэзідэнт ІГ "Маскоўскія партнёры" Яўгеній Коган. Паводле ягонага прагнозу даляр застанецца ў дыяпазоне 69,5-73,5 рубля.