У Расеі адбыўся выбух на парахавым заводзе пад Разанню: загінулі 17 чалавек

• 22.10.2021, 15:05

У тушэнні пажару задзейнічалі больш за 170 чалавек і 50 адзінак тэхнікі.

У Разанскай вобласці РФ 17 чалавек загінулі ў выніку інцыдэнту ў цэху вытворчасці пораху, паведамляе РБК.

«Цяпер супрацоўнікі Шылаўскага міжраённага следчага аддзела выехалі на месца здарэння. Пакуль яшчэ пажар не патушаны, таму на месца здарэння нашы супрацоўнікі не дапушчаныя», - гаворыцца ў паведамленні СК.

Паводле інфармацыі «Інтэрфакса», у будынку цэха ў Шылаўскім раёне здарыўся пажар. «У цэху вырабляўся і захоўваўся порах», - сказала крыніца. З яе слоў, лёс яшчэ 10 работнікаў застаецца невядомым.

Пазней агенцтва, спасылаючыся на інфармаваную крыніцу, паведаміла, што ў цэху адбыўся выбух. «Паводле папярэдніх звестак, пяць чалавек загінулі на месцы, яшчэ двое памерлі па дарозе ў лякарню», - сказаў ён. «112» таксама паведамляе, што ў цэху адбыўся выбух.

РІА «Новости» сцвярджае, што ў цэху адбыўся пажар. Агенцтва і Mash адзначаюць, што інцыдэнт адбыўся на заводзе «Эластык».

У прэс-службе МНС Расеі паведамілі РІА «Новости», што прычынай пажару стала парушэнне тэхналагічнага працэсу. «У выніку тэхналагічнага працэсу адбылося ўзгаранне на тэрыторыі аднаго з цэхаў ФГУП «Эластык», - сказаў суразмоўца агенцтва, удакладніўшы, што плошча пажару высвятляецца.

Паводле папярэдніх звестак МНС, пагрозы насельніцтву няма.