Сілы супраціву ў Афганістане абвясцілі аб пачатку ўзброенай барацьбы

• 19.10.2021, 12:26

Будзе весціся партызанская вайна.

Афганскі Фронт нацыянальнага супраціву, узначалены Ахмадам Масудам, сынам загінулага лідара антыталібаўскай кааліцыі Ахмад Шаха Масуда, абвясціў аб пачатку ўзброенай барацьбы супраць баевікоў радыкальнага ісламскага руху "Талібан" у правінцыі Капіса, паведамляе "Нямецкая хваля".

У відэазвароце Фронту, які размешчаны ў аўторак, 19 кастрычніка, на сайце афганскага інфармацыйнага агенцтва Aamaj News, гаворыцца, што байцы супраціву нароўні з Панджшэрам і Андарабам будуць весці партызанскую вайну супраць талібаў на тэрыторыі правінцыі Капіса.

Баевікі руху "Талібан" пасля вываду войскаў ЗША і NАТО з Афганістана ў самыя кароткія тэрміны захапілі ў жніўні практычна без бою амаль усе правінцыі краіны. 15 жніўня яны авалодалі Кабулам.

Пасля гэтага больш за два тыдні талібы спрабавалі штурмам захапіць адзіную непадуладную ім правінцыю Панджшыр. 6 верасня яны заявілі пра захоп даліны. Аднак прадстаўнікі антыталібаўскага Фронту нацыянальнага супраціву сцвярджаюць, што радыкалам з дапамогай пакістанскай авіяцыі ўдалося авалодаць толькі галоўнай цяснінай Панджшэра, усе 23 іншых цясніны рэгіёну знаходзяцца пад кантролем Фронту. ФНС таксама заявіў, што арганізаваў разам з панджшэрцамі ўзброены супраціў талібам у даліне Андараб у суседняй правінцыі Баглан.