Аналітык: Рэжым Лукашэнкі пераходзіць у стан паралічу

• 17.10.2021, 19:41

Рычагоў кіравання становіцца ўсё менш.

Незалежны аналітык Сяргей Чалы ў чарговым стрыме на сваім YouTube-канале паразважаў аб тым, што сістэма ўлады Аляксандра Лукашэнкі пераходзіць у «якасна новы стан».

«Я думаю, мы пачынаем назіраць змену рэжыму функцыянавання Лукашэнкі. Ад імпульсіўных дзеянняў, якія выдаваліся за нейкую пазітыўную рэакцыю («Я ўмомант прыняў рашэнне»), хутчэй за ўсё сістэма пераходзіць у стан паралічу, таму што праблем, з якімі даводзіцца спраўляцца, становіцца ўсё больш, а рычагоў кіравання гэтымі праблемамі становіцца ўсё менш», - заявіў Чалы.

Пакуль Сяргей Чалы кажа, што гэта «здагадка». І наколькі ён мае рацыю, можна будзе меркаваць па далейшых падзеях у Беларусі. Але ўжо зараз незалежны аналітык заўважае, што «сістэма не працуе без таго, каб ёй падаў нейкі зразумелы сігнал Лукашэнка». А ён такога сігналу не падае.