Польшча з 1 лютага аслабіць каранавірусныя абмежаванні

• 28.01.2021, 19:02

Адкрыюцца ГЗЦ і музеі.

Міністр аховы здароўя Польшчы Адам Нядзельскі паведаміў, што з 1 лютага зноў адкрыюць крамы ў гандлёвых цэнтрах і адновяць работу ўстановы культуры.

Пра гэта паведамляе агенцтва PAP.

«З 1 лютага будуць адкрыты крамы ў гандлёвых цэнтрах, а таксама мастацкія галерэі і музеі, але з захаваннем санітарнага рэжыму. Асновы дзейнасці рэстаранаў, пабаў, гатэляў і спартыўных аб'ектаў застаюцца без змен», - сказаў міністр.

Таксама з 1 лютага скасуюць гадзіны, у якія абслугоўваюць пажылых людзей.

Застаюцца ў сіле патрабаванні захавання сацыяльнай дыстанцыі і нашэння ахоўных масак.

Да 14 лютага не зменяцца і патрабаванні ў дачыненні да грамадскіх сходаў і сустрэч у прыватных дамах, а таксама асновы перасячэння межаў.

Са слоў Нядзельскага, цяпер сітуацыя з каранавірусам у Польшчы выглядае стабілізаванай, аднак фактарамі рызыкі застаюцца міжнародная сітуацыя і мутацыі каранавіруса.