МЗС Францыі прапанавала ўвесці дзейсныя санкцыі праз Навальнага

• 24.01.2021, 19:57

Кіраўнік МЗС Францыі таксама адзначыў поспех расейскіх мітынгаў.

Міністр замежных спраў Францыі Жан-Іў Ле Дрыян заявіў, што супраць Расеі неабходна ўвесці дзейсныя санкцыі праз атручванне апазіцыянера Аляксея Навальнага. Пра гэта ён сказаў у эфіры радыёстанцыі France Inter, паведамляе РБК.

«Што тычыцца санкцый, неабходна іх зрабіць па-сапраўднаму дзейснымі. І дыскусіі на гэтую тэму пройдуць заўтра на Еўрарадзе», - паабяцаў міністр.

Ле Дрыян назваў арышт Навальнага, якога затрымалі адразу ж пасля вяртання ў Расею, трывожным знакам. Кіраўнік МЗС адзначыў поспех расейскіх мітынгаў, якія прайшлі напярэдадні ў падтрымку апазіцыянера, і нагадаў пра неабходнасць расследаваць прычыны яго атручвання.

Навальнаму стала дрэнна ў жніўні падчас пералёту з Томска ў Маскву, самалёт экстранна сеў у Омску. Палітыка шпіталізавалі, ён трапіў у кому, пазней Навальнага перавезлі на лячэнне ў Бэрлін. Нямецкія спецыялісты знайшлі ў арганізме пацыента сляды яду з групы «Навічок».