Беларусы запусцілі праект, каб пазбавіць рэжым фінансавання

• 21.01.2021, 14:10

Актывісты «Эканамічнага ціску» знаходзяць болевыя кропкі ў сістэме.

Беларусы замежжа запусцілі праект, мэта якога – пазбавіць рэжым Лукашэнкі фінансавання, паведамляе тэлеграм-канал «Баста!».

Каб дасягнуць мэты, актывісты «Эканамічнага ціску» просяць замежных партнёраў «адыёзных» беларускіх прадпрыемстваў спыніць супрацоўніцтва з апошнімі і падтрымаць працаўнікоў, якія страйкуюць.

Бізнэсмэнам і чыноўнікам нагадваюць пра персанальную адказнасць і санкцыі, а працоўным, якія страйкуюць, забяспечваюць падтрымку замежных прафзвязаў, асацыяцый і СМІ.

Важны вынік – праверка, з якой нарвежская кампанія Yara прыехала ў Беларусь; пасля праверкі гаворка зайшла пра прыпыненне супрацоўніцтва. Гэта плён супольнай працы дыяспараў, страйкамаў, прафзвязаў і самы паспяховы прыклад эканамічнага ціску, такога ж мы хочам ад усіх буйных партнёраў.

Галоўныя кірункі праекта: сабраць базу звестак на прадпрыемствах, праца з прафзвязамі, праца з банкамі і санкцыі.

Стваральнікі «Эканамічнага ціску» паведамляюць, што ўжо ідзе праца над асобным праектам датычна Беларускай атамнай электрастанцыі. Ягоная мэта – дамагчыся, каб Еўразвяз адмовіўся ад энэргіі, што вырабляецца БелАЭС.