Мікалай Сванідзэ напісаў ліст генеральнаму пракурору Швэду

• 20.01.2021, 10:22

У ім гаворыцца пра Марыю Калеснікаву.

Вядомы расейскі журналіст, чалец Рады развіцця грамадзянскай супольнасці і правоў чалавека пры прэзідэнце РФ Мікалай Сванідзэ напісаў ліст генеральнаму пракурору Беларусі Андрэю Шведу аб сітуацыі з Марыяй Калеснікавай, паведамляе tut.by.

- Паважаны Андрэй Іванавіч, я мог бы нагадаць Вам пра тое, што М.А. Калеснікава затрыманая за выказванне свайго меркавання, і гэта затрыманне ёсць парушэннем базавага правы чалавека - права на свабоду слова.

Я б мог нагадаць таксама пра тое, што М.А. Калеснікава заўсёды дзейнічала публічна і адкрыта і ніколі не дэманстравала намеры пакінуць тэрыторыю Рэспублікі Беларусь.

Сванідзэ просіць таксама ўлічыць, што ўмовы ўтрымання Марыі могуць нанесці непапраўную шкоду яе здароўю: яе трымаюць у камеры з курчыхамі, з-за чаго ў яе развіўся пастаянны кашаль, а просьба аб сустрэчы з лекарам з лістапада не задаволеная, гаворыцца ў лісце.

- Падаецца, што М.А. Калеснікава не нясе грамадскай небяспекі і прымяненне да яе меры стрымання ў выглядзе ўзяцця пад варту з'яўляецца залішняй і непрапарцыйна жорсткай, - адзначае Мікалай Сванідзэ і з улікам абставін і асобы Калеснікавай просіць ацаніць мэтазгоднасць утрымання яе пад вартай і прыняць гуманную пастанову.

Ліст адпраўлены 13 студзеня. Варта меркаваць, што Швэд яго ўжо атрымаў і, мабыць, разважае над адказам.

Нагадаем, Марыя Калеснікаў знаходзіцца за кратамі з 8 верасня. Праваабаронцамі яна прызнаная вязнем сумлення.