Штаб Бабарыкі: Суд над Віктарам стане важнай падзеяй сёлета

• 18.01.2021, 21:47

Штаб Віктара Бабарыкі апублікаваў заяву.

«Мы хочам нагадаць, што Віктар Бабарыка ўжо 7 месяцаў утрымліваецца ў СІЗА толькі таму, што дзейная ўлада ўбачыла ў ім моцнага спаборніка на прэзідэнцкіх выбарах. Усяго за месяц пасля абвяшчэння пра сваё рашэнне стаць кандыдатам Віктар Бабарыка сабраў такую магутную і шырокую падтрымку сярод беларусаў, што стала відавочным: яго знаходжанне на свабодзе вядзе да немінучага і лагічнага завяршэння існага палітычнага ладу.

Рэйтынг Віктара Бабарыкі не падае, незалежна ад таго, колькі часу ён знаходзіцца пад вартай.

18 студзеня матэрыялы справы перададзеныя ў Генеральную пракуратуру. З моманту перадачы пракуратурай справы ў суд можа прайсці да двух месяцаў да першага пасяджэння. У любым выпадку гэты суд стане важнай падзеяй года. Мы патрабуем, каб ён быў адкрытым, з допускам незалежнай прэсы.

Беларусы бурна рэагавалі на зняволенне Бабарыкі пад варту, на адмову ў рэгістрацыі яго кандыдатам. Тысячы беларусаў віншавалі Віктара Бабарыку з днём нараджэння. Упэўненыя, дзясяткі тысяч падтрымаюць яго і гэтым разам», - гаворыцца ў паведамленні штаба Віктара Бабарыкі.