Затрыманая баскетбалістка Алена Леўчанка

• 30.09.2020, 9:54

(абноўлена) Спартоўку адвезлі ў Ленінскі РУУС Менска.

Затрыманая баскетбалістка Алена Леўчанка, паведамляе «Наша Ніва». Са звестак выдання яе адвезлі ў Ленінскі РУУС г. Менска. Яе тэлефон цяпер выключаны.

Журналістам tut.by стала вядома, што сёння раніцай Алена Леўчанка патэлефанавала адвакату Міхаілу Кірылюку і паведаміла, што яе затрымалі ў аэрапорце перад вылетам на планавае лячэнне і рэабілітацыю (ёсць афіцыйныя дакументы) і вязуць у Ленінскі РУУС у сувязі з удзелам у незаконных масавых мерапрыемствах.

Са слоў Алены, яе абвінавачваюць паводдле ч. 1 арт. 23.34 КоАП (Парушэнне парадку арганізацыі або правядзення масавых мерапрыемстваў).

РУУС пакуль факт знаходжання Леўчанкі адвакату не пацвердзіла. Пра дату і час суда не вядома, але ён не павінен быць не пазней чым праз 72 гадзіны.

Нагадаем, раней Алена актыўна выказвалася супраць гвалту ў краіне і за правядзення паўторных выбараў, яна таксама ўваходзіла ў Свабоднае аб'яднанне спартоўцаў Беларусі, падпісала адкрыты ліст да ўлады і сілавікаў і пастаянна хадзіла на нядзельныя маршы.