Затрыманы актор Купалаўскага тэатра Андрэй Дробыш
- 24.09.2020, 11:16
Актора арыштавалі 23 верасня.
Актор Купалаўскага тэатра Андрэй Дробыш быў затрыманы ўчора, 23 верасня. Інфармацыю пра гэта tut.by пацвердзілі ягоныя родныя.
Дробыш быў затрыманы ўчора ўвечары, 23 верасня, у раёне станцыі метро "Усход". Ён быў дастаўлены ў Першамайскі РУУС і пазней пераведзены на Акрэсціна.
Цяпер сям'я актора знаходзіцца на сувязі з адвакатам.
Андрэй Дробыш нарадзіўся ў 1982 годзе ў гарадскім пасёлку Варапаева Пастаўскага раёна Віцебскай вобласці. У 2006-м скончыў тэатральны факультэт Беларускай дзяржаўнай акадэміі мастацтваў паводле спецыяльнасці «Акторскае мастацтва драмы і кіно» (курс народнага артыста Беларусі Валерыя Раеўскага).
Працаваў у Купалаўскім з 2005 года. Быў адным з першых актораў тэатра, хто падаў заяву аб сыходзе, пратэстуючы супраць звальнення дырэктара тэатра Паўла Латушкі і падзей у краіне.
Нагадаем, што ўчора ў Беларусі прайшлі масавыя пратэсты супраць незаконнай "інаўгурацыі" самазванца Лукашэнкі.