Навальны ўпершыню з'явіўся на публіцы пасля выпіскі з лякарні
- 23.09.2020, 17:47
Апазіцыянер распавёў, што плануе прайсці курс фізіятэрапіі.
Расейскі апазіцыянер Аляксей Навальны ў сераду з'явіўся на публіцы ўпершыню пасля выпіскі з берлінскай лякарні, дзе, са слоў уладаў Нямеччыны, яго лячылі ад атручвання патэнцыйна смяротным нервова-паралітычным агентам, паведамляе «Голас Амерыкі».
Навальнага даставілі ў Берлін у мінулым месяцы пасля таго, як яму стала дрэнна падчас пералёту па Расеі. Захад запатрабаваў тлумачэнняў ад Крамля, які адмаўляе сваю датычнасць да інцыдэнту і заяўляе, што дагэтуль не атрымаў доказаў атручвання.
Навальны апублікаваў у «Інстаграме» фатаграфію, на якой ён сядзіць у парку пасля выпіскі з лякарні. 44-гадовы апазіцыянер распавёў, што плануе прайсці курс фізіятэрапіі ў рэабілітацыйным цэнтры, каб аднавіць рухальныя функцыі, у тым ліку паўнавартаснае валоданне левай рукой.
«Пасля 32 дзён у шпіталі лекары вызначылі, што далейшае аднаўленне патрабуе не стацыянарнага лячэння, а нармалізацыі жыцця. Хадзіць, праводзіць час з сям'ёй. Пагрузіцца ў руціну штодзённых рухаў, - напісаў ён. - Планы пакуль простыя: фізіятэрапеўт кожны дзень. Магчыма, рэабілітацыйны цэнтр. Стаяць на адной назе. Цалкам вярнуць кантроль над пальцамі. Трымаць баланс».
Навальны падзякаваў лекарам берлінскай клінікі «Шарытэ» за нададзеную дапамогу.
Паплечнікі апазіцыянера раней заяўлялі, што ён плануе з часам вярнуцца ў Расею, аднак у апошнім паведамленні Навальнага пра гэта не гаворыцца.
Пра тое, што Навальны быў атручаны рэчывам з сямейства «Навічок», паведамілі ўлады Нямеччыны са спасылкай на вынікі аналізаў у лабараторыі бундэсвера, якія пазней пацвердзілі ў лабараторыях Францыі ды Швэцыі.
Крэмль у сераду заявіў, што ў атачэнні расейскага прэзідэнта Уладзіміра Пуціна няма доступу да такіх рэчываў.
У «Шарытэ» мяркуюць, што стан Навальнага настолькі палепшыўся, каб яго можна было выпісаць са стацыянара. «Зыходзячы з цяперашняга стану пацыента, лекары мяркуюць, што яго поўнае выздараўленне магчымае. Пра якія-небудзь аддаленыя наступствы цяжкага атручвання можна будзе меркаваць пазней», - заявілі ў клініцы.
Навальны правёў у шпіталі 32 дні, з іх 24 - у рэанімацыі.
Прэс-сакратар Крамля Дзмітрый Пяскоў заявіў, што расейскія ўлады ўзрадаваны паведамленнямі аб выздараўленні Навального і што ён, як і любы расійскі грамадзянін, можа ў любы момант вярнуцца ў краіну.