Камітэт сената ЗША зацвердзіў кандыдатуру амбасадара ў Беларусі

• 22.09.2020, 19:01

Цяпер кандыдатуру Джулі Фішэр павінен ухваліць поўны склад сената.

22 верасня Камітэт міжнародных спраў сената ЗША зацвердзіў кандыдатуру Джулі Фішэр на пасаду амбасадаркі ў Беларусі. На гэты момант яна працуе намесніцай памочніка дзяржсакратара ў пытаннях Заходняй Еўропы і ЕЗ. Цяпер яе кандыдатуру павінен ухваліць поўны склад сената.

Пра тое, што амбасадаркай ЗША ў Беларусі можа стаць «ветэран дыпламатыі» Джулі Фішэр, стала вядома ў пачатку лютага 2020-га. Амерыканскага амбасадара ў нашай краіне няма з 2008 года.

Адзначым, ЗША, як і ЕЗ, не ўважае Лукашэнку легітымным кіраўніком нашай краіны.

Беларускі амбасадар у ЗША быў прызначаны ў ліпені, ім стаў былы намеснік міністра замежных спраў Алег Краўчанка.